امریکا اور سعودی عرب کے درمیان جوہری معاہدے کا متن سامنے آگیا

امریکا اور سعودی عرب کے درمیان طے پانے والے تاریخی سول جوہری معاہدے کا باضابطہ متن سامنے آ گیا ہے، جس میں جوہری پروگرام کے بدلے اسرائیل کو تسلیم کرنے کی کسی شرط کو شامل نہیں کیا گیا ہے۔ بی بی سی کی رپورٹ کے مطابق امریکی کانگریس کو بھیجی گئی سرکاری دستاویزات میں ابراہیمی معاہدوں یا اسرائیل کے ساتھ تعلقات استوار کرنے سے متعلق کسی پابندی کا ذکر موجود نہیں، جبکہ ریاض کے لیے 20 فیصد تک یورینیم افزودگی کا راستہ بھی کھلا رکھا گیا ہے۔ اس کے علاوہ معاہدے کے تحت سعودی عرب کو بین الاقوامی جوہری توانائی ایجنسی (IAEA) کے سخت ترین اضافی پروٹوکول میں شامل ہونے کا پابند بھی نہیں بنایا گیا ہے۔

معاہدے کی شق 7 کے مطابق امریکہ کی تحریری رضامندی کے بعد منتقل یا تیار کردہ یورینیم کو مزید افزودہ کیا جا سکے گا اور دونوں ممالک مل کر افزودگی کے مواقع کا جائزہ لیں گے۔ شق کی دفعہ 5 کی رو سے اگر امریکی ٹیکنالوجی اور آلات استعمال کیے جائیں تو یورینیم افزودگی کی حد 5 فیصد تک رہے گی۔ معاہدہ سعودی عرب کو بنیادی معائنے قبول کرنے کا پابند بناتا ہے، تاہم اضافی پروٹوکول اختیاری رہے گا۔ تجزیہ کاروں کے مطابق متحدہ عرب امارات کے سابقہ جوہری معاہدے سے تقابل کیا جائے تو صدر ڈونلڈ ٹرمپ کی جانب سے سعودی عرب کو اس معاہدے میں انتہائی اہم اور غیر معمولی رعایتیں دی گئی ہیں۔