عوام پر مہنگائی کا نیا وار! پٹرولیم مصنوعات کی قیمتوں میں بڑا اضافہ

وفاقی حکومت نے عوام پر مہنگائی کا نیا بوجھ ڈالتے ہوئے پٹرولیم مصنوعات کی قیمتوں میں ایک بار پھر بڑا اضافہ کر دیا ہے۔ پٹرولیم ڈویژن کی جانب سے جاری کردہ رسمی نوٹیفکیشن کے مطابق پٹرول کی فی لٹر قیمت میں 12 روپے 90 پیسے اور ہائی اسپیڈ ڈیزل کی قیمت میں 3 روپے 72 پیسے فی لٹر اضافہ کر دیا گیا ہے۔ اس اضافے کے بعد پٹرول کی نئی قیمت 358 روپے 77 پیسے فی لٹر جبکہ ڈیزل کی نئی قیمت 381 روپے 77 پیسے فی لٹر مقرر کی گئی ہے۔

پٹرول اور ڈیزل کی ان نئی قیمتوں کا اطلاق فوری طور پر آج رات 12 بجے سے ہوگا، جو فی الحال ایک دن کے لیے یعنی 8 ستمبر تک نافذ العمل رہے گا۔ واضح رہے کہ وزارتِ پٹرولیم کی نئی پالیسی کے تحت پٹرولیم مصنوعات کی قیمتوں میں ردوبدل روزانہ کی بنیاد پر کیا جا رہا ہے۔ پٹرولیم مصنوعات کے نرخوں میں مسلسل اضافے کے باعث ملک بھر میں گڈز و پبلک ٹرانسپورٹ کے کرایوں، زرعی پیداوار اور روزمرہ کی اشیائے ضروریہ کی قیمتوں پر اضافی دباؤ اور مہنگائی کی نئی لہر آنے کا شدید خدشہ ظاہر کیا جا رہا ہے۔