آبنائے ہرمز سے روزانہ 90 لاکھ بیرل تیل گزر رہا ہے، امریکی وزیر توانائی

امریکی وزیر توانائی کرس رائٹ نے دعویٰ کیا ہے کہ ایران کی جانب سے شدید کشیدگی اور محدود زون کے اعلانات کے باوجود آبنائے ہرمز کے ذریعے روزانہ تقریباً 90 لاکھ بیرل خام تیل کی بین الاقوامی ترسیل کامیابی سے جاری ہے۔ ایک رسمی بیان میں کرس رائٹ نے کہا کہ آبنائے ہرمز سے تیل کی یہ مسلسل ترسیل عالمی منڈیوں میں توانائی کی بڑھتی ہوئی قیمتوں کا دباؤ کم کرنے میں مدد دے رہی ہے، جبکہ اس کے علاوہ خطے میں پائپ لائنز کے متبادل نظام کے ذریعے بھی تیل کی نقل و حمل جاری رکھی گئی ہے۔

امریکی وزیر توانائی نے مزید واضح کیا کہ اس وقت خلیج فارس میں تیل کی محفوظ ترسیل کا بڑا انحصار امریکی بحریہ کی متحرک موجودگی پر ہے۔ انہوں نے بتایا کہ امریکی بحری افواج آئل ٹینکرز کو ممکنہ ایرانی بحری و میزائل حملوں اور رکاوٹوں سے بچانے کے لیے مکمل سیکیورٹی اور حفاظتی حصار فراہم کر رہی ہیں تاکہ عالمی سپلائی چین متاثر نہ ہو۔