امریکی ریپر نے نیوجرسی کانسرٹ کو فلسطین کے حق میں مظاہرے میں بدل دیا

نیویارک/نیوجرسی: ممتاز امریکی ریپر میکلمور (Macklemore) نے نیوجرسی میں منعقدہ ایک بڑے میوزک کنسرٹ کو فلسطین کی حمایت اور آزادی کے حق میں احتجاجی مظاہرے میں تبدیل کر دیا۔

برطانوی گلوکار ایڈ شیرن کے ساتھ اسٹیج پر پرفارم کرتے ہوئے میکلمور نے 80 ہزار سے زائد شائقین کی موجودگی میں گلے میں فلسطینی چفیہ (کفایہ) پہن کر “فلسطین کو آزاد کرو” (Free Palestine) کے پرجوش نعرے لگائے۔ انہوں نے اپنے خطاب میں کہا کہ غزہ اور مغربی کنارے کے مظلوم عوام یہ بات اچھی طرح جان لیں کہ دنیا انہیں بھولی نہیں ہے اور زمین کا ہر انسان برابر کی آزادی و بنیادی انسانی حقوق کا مستحق ہے۔

کنسرٹ کے دوران میکلمور نے اپنے مشہور احتجاجی نغمے “ہندز ہال” (Hind’s Hall) پر پرفارم کیا، جبکہ بیک اسٹیج کی بڑی اسکرینوں پر غزہ کے مناظر اور فلسطینیوں کے ساتھ عالمی یکجہتی کے پیغامات ڈسپلے کیے گئے۔ اس موقع پر امریکی ریپر نے فلسطین کے ساتھ ساتھ لبنان، ایران، سوڈان اور کیوبا کی آزادی کے حق میں بھی آواز بلند کی، جسے تقریب میں موجود ہزاروں شائقین نے سراہا۔