ترکیہ: کالعدم کردستان ورکرز پارٹی کے جنگجوؤں کے لیے سزا میں نرمی کا قانون منظور

ترکی کی پارلیمنٹ نے انقرہ حکومت اور کالعدم کردستان ورکرز پارٹی (پی کے کے) کے درمیان جاری امن عمل کے تحت متعدد سابق جنگجوؤں کے لیے جزوی معافی اور قید کی سزائیں معطل کرنے کا قانون منظور کر لیا ہے۔ ٹی آر ٹی کے مطابق اس فریم ورک لا کے حق میں 468 جبکہ مخالفت میں 88 ووٹ آئے، جس کی مرکزی مخالفت قوم پرست اپوزیشن جماعت ‘گڈ پارٹی’ نے کی۔ اس قانون کے تحت سنگین جرائم کے علاوہ دیگر تحقیقات اور عدالتی کارروائیاں معطل کر دی جائیں گی، تاہم قتل اور 2005 سے قبل کے عمر قید والے جرائم اس معافی سے مستثنیٰ ہوں گے۔ اس استثناء کے باعث جیل میں قید پی کے کے رہنما عبداللہ اوجلان اور شمالی عراق میں موجود تنظیم کے بانی ارکان اس قانون سے فائدہ نہیں اٹھا سکیں گے۔

واضح رہے کہ پی کے کے نے ترکی کے خلاف 1984 سے مسلح شورش شروع کر رکھی تھی اور چار دہائیوں سے جاری اس تنازع کے بعد عبداللہ اوجلان کی اپیل پر تنظیم نے 2025 میں اپنی تحلیل اور ہتھیار ڈالنے کا اعلان کیا تھا۔ ترکی کی کل آبادی کا 15 سے 20 فیصد حصہ پر مشتمل کردوں کے حوالے سے بنائے گئے اس نئے قانون کو حکومت نواز میڈیا نے ہتھیار ڈالنے کی طرف بڑا قدم قرار دیا ہے، جبکہ اپوزیشن میڈیا نے اسے دہشت گردی کو رعایتیں دینے کے مترادف قرار دیتے ہوئے شکوک و شبہات کا اظہار کیا ہے۔