یوکرین کا مگ-29 لڑاکا طیارہ گر کرتباہ

جنوبی یوکرین کے علاقے اودیسا میں ایک جنگی مشن کے دوران یوکرینی فضائیہ کا مگ-29 (MiG-29) لڑاکا طیارہ تباہ ہو گیا ہے، تاہم پائلٹ وقت پر ایجیکٹ کر کے اپنی جان بچانے میں کامیاب رہا۔ یوکرینی فضائیہ کے مطابق 10 اگست کی شام فضائی اہداف کو نشانہ بناتے ہوئے میزائل داغنے کے دوران طیارے میں اچانک ہنگامی صورتحال پیدا ہوئی اور آگ لگ گئی، جس کے بعد طیارہ کنٹرول سے باہر ہو گیا۔ حادثے کا شکار ہونے والے پائلٹ کو علاج کے لیے ہسپتال منتقل کر دیا گیا ہے اور واقعے کی وجوہات جاننے کے لیے تحقیقات کا آغاز کر دیا گیا ہے۔ واضح رہے کہ دو ہفتوں سے بھی کم عرصے میں یوکرینی فضائیہ کا یہ دوسرا بڑا نقصان ہے؛ اس سے قبل 29 جولائی کو ایک ایف-16 (F-16) لڑاکا طیارہ بھی دوران پرواز ہنگامی صورتحال کی وجہ سے تباہ ہو گیا تھا۔