امریکا اور اسرائیل کے شام سے جوہری مواد ہٹانے کے لیے مذاکرات کامیاب

امریکی اور اسرائیلی حکام کے شام کے ساتھ جاری خفیہ مذاکرات کامیاب ہو گئے ہیں، جس کے بعد شام میں موجود ایک انتہائی حساس اور خفیہ مقام سے نیوکلیئر مواد کو جلد منتقل کیے جانے کا امکان ہے۔ امریکی نیوز ویب سائٹ کی رپورٹ کے مطابق ٹرمپ انتظامیہ، شام اور اسرائیل کے درمیان طے پانے والے معاہدے کے تحت انٹرنیشنل اٹامک انرجی ایجنسی (IAEA) اس نیوکلیئر مواد کو اپنے قبضے میں لے گی۔

رپورٹ کے مطابق شام میں واقع خفیہ مقام “سائٹ 99” طویل عرصے سے امریکا اور اسرائیل کے لیے شدید تشویش کا باعث بنا ہوا تھا۔ سابق بشار الاسد حکومت نے اپنے خفیہ نیوکلیئر پروگرام کے تحت الکِبار ری ایکٹر قائم کیا تھا، جسے اسرائیل نے 2007 میں بمباری کر کے تباہ کر دیا تھا۔ تاہم بشار اسد حکومت کے خاتمے کے بعد آئی اے ای اے کو ان مقامات تک رسائی حاصل ہوئی۔

امریکی حکام نے انکشاف کیا ہے کہ اسرائیل نے “سائٹ 99” سے نیوکلیئر مواد نہ ہٹائے جانے کی صورت میں وہاں دوبارہ فوجی کارروائی کی دھمکی دی تھی اور یہ خدشہ بھی ظاہر کیا تھا کہ ترکیہ بھی شام کی اس مواد تک رسائی میں مدد کر سکتا ہے۔ بعد ازاں، ٹرمپ انتظامیہ کی مداخلیت اور سفارتی کوششوں کے بعد آئی اے ای اے کو اس کارروائی میں شامل کیا گیا۔ امریکی ذرائع کے مطابق شام کی موجودہ حکومت نے سائٹ تک مکمل اور بلا تعطل رسائی کی فراہمی میں بھرپور تعاون کیا ہے۔