رہبرِ انقلاب نے دشمن کے خلاف قومی اتحاد، یکجہتی برقرار رکھنے پر زور دیا: ایرانی صدر

ایرانی صدر ڈاکٹر مسعود پزشکیان نے انکشاف کیا ہے کہ انہوں نے ملک کو درپیش اہم مسائل پر رہبرِ انقلاب سپریم لیڈر مجتبیٰ خامنہ ای سے 7 گھنٹے طویل نشست کی، جس میں دشمن کی سازشوں کا مقابلہ کرنے کے لیے قومی اتحاد اور یکجہتی کو فروغ دینے پر تفصیلی تبادلہ خیال کیا گیا۔

ایرانی صدر نے میڈیا کو بتایا کہ دشمن کی تمام تر حکمت عملی ملک میں داخلی انتشار اور اختلافات پیدا کرنے پر مرکوز ہے۔ ملاقات کے دوران اس بات پر مکمل اتفاق ہوا کہ قومی اتحاد کو نقصان پہنچانے والے کسی بھی بیان یا عمل سے مکمل گریز کیا جائے۔ انہوں نے کہا کہ اگرچہ اندرونِ ملک سیاسی یا نظریاتی اختلافات ہو سکتے ہیں، لیکن بیرونی دنیا کے سامنے ایران کا مؤقف اور آواز مکمل طور پر ایک ہونی چاہیے۔

مسعود پزشکیان نے واضح کیا کہ ایران اپنی آزادی، قومی وقار اور اسلامی نظریات کے دفاع میں بلا خوف و خطر مضبوطی سے کھڑا ہے۔ انہوں نے بتایا کہ ملاقات کے دوران عوام کے روزگار، معیشت، رہائش اور عالمی پابندیوں سے پیدا ہونے والے اثرات پر تفصیلی بات چیت ہوئی۔ صدر نے انتہائی عاجزی کے ساتھ کہا کہ موجودہ مشکل حالات میں اگر حکومت کی جانب سے کوئی کمی یا ناکامی نظر آئے تو وہ عوام سے معذرت خواہ ہیں اور حکومت عوامی مسائل کے حل کے لیے دن رات جدوجہد جاری رکھے گی۔