کسٹمز بانڈڈ وئیر ہاؤسز میں کسی بھی بے ضابطگی کی گنجائش نہیں: وزیراعظم

وزیراعظم شہباز شریف کی زیر صدارت فیڈرل بورڈ آف ریونیو (ایف بی آر) کے امور سے متعلق اعلیٰ سطح کا جائزہ اجلاس منعقد ہوا، جس میں انہوں نے ملک بھر کے کسٹمز بانڈڈ ویئر ہاؤسز کا 3 سالہ تھرڈ پارٹی آڈٹ کروانے کی ہدایت جاری کی ہے۔ وزیراعظم نے واضح کیا کہ ویئر ہاؤسز میں کسی بھی قسم کی بے ضابطگی یا غیر قانونی سرگرمی کی کوئی گنجائش نہیں ہے اور اس میں ملوث اہلکاروں کے خلاف سخت سے سخت قانونی کارروائی کی جائے گی۔ اجلاس کے دوران حکام کی جانب سے بریفنگ دیتے ہوئے بتایا گیا کہ وزیراعظم کی ہدایات کی روشنی میں تمام کسٹمز بانڈڈ ویئر ہاؤسز کی فزیکل اسٹاک ویری فکیشن کروائی جائے گی، جبکہ لائسنسنگ اور سیکیورٹی کے نظام کو مزید شفاف اور مؤثر بنانے کے لیے ہنگامی بنیادوں پر اقدامات جاری ہیں۔