موجودہ الیکشن میں لوگوں کی رائے پر حکومتیں نہیں بنیں: حافظ نعیم الرحمٰن

امیرِ جماعتِ اسلامی پاکستان حافظ نعیم الرحمٰن نے کراچی میں پریس کانفرنس کرتے ہوئے کہا ہے کہ موجودہ الیکشن میں لوگوں کی رائے پر حکومتیں نہیں بنیں اور جب عوامی مرضی کو نظر انداز کیا جائے تو شدید اعتماد کا بحران جنم لیتا ہے۔ انہوں نے پی ڈی ایم کے اعترافِ نااہلی پر بات کرتے ہوئے کہا کہ محض اعتراف سے مسائل حل نہیں ہوں گے بلکہ یہ دیکھنا ہوگا کہ شفاف الیکشن کیسے ممکن بنائے جائیں۔ ان کا مزید کہنا تھا کہ موجودہ نظام عام لوگوں کے حقوق تحفظ فراہم کرنے میں ناکام ہو چکا ہے اور اس کا حل صرف اور صرف آئین کو مقدم رکھنے اور نظام کو تبدیل کرنے میں ہے۔

خارجہ امور پر گفتگو کرتے ہوئے حافظ نعیم الرحمٰن نے ‘مکہ معاہدے’ کا خیرمقدم کیا اور تجاویز دیں کہ اس کے اگلے مرحلے میں ایران، قطر اور بنگلادیش کو بھی شامل کیا جائے۔ انہوں نے زور دیا کہ مکہ معاہدہ صرف دفاع تک محدود نہ رہے بلکہ معاشی تعاون پر بھی محیط ہونا چاہیے تاکہ یہ اتحاد اسرائیل کو کھل کر آنکھیں دکھا سکے۔ انہوں نے غزہ میں جاری مظالم کی شدید مذمت کرتے ہوئے کہا کہ امریکا اس وقت مکمل طور پر اسرائیل کے ہاتھوں یرغمال بنا ہوا ہے۔