شامی عدالت نے معزول صدر بشارالاسد کو سزائے موت سنادی

شام کی ایک عدالت نے معزول و مفرور سابق صدر بشار الاسد کو ان کی غیر موجودگی میں، جبکہ ان کے کزن اور سابق سیکورٹی عہدیدار عاطف نجیب کی موجودگی میں پیشگی منصوبہ بندی اور جان بوجھ کر قتل کے الزامات کے تحت سزائے موت سنا دی ہے۔ پیشہ کے لحاظ سے آنکھوں کے معالج بشار الاسد نے جولائی 2000ء سے دسمبر 2024ء تک شام پر حکومت کی۔ 2011ء کی عرب بہار کے بعد شروع ہونے والے عوامی مظاہروں کے خلاف ان کی حکومت کی طاقت کے استعمال کے باعث ایک طویل خانہ جنگی شروع ہوئی جس میں 5 سے 6 لاکھ افراد لقمہ اجل بنے اور نصف سے زائد آبادی بے گھر ہوئی۔ دسمبر 2024ء میں شامی باغیوں کے دمشق پر قبضے کے بعد بشار الاسد کی حکومت ختم ہوئی اور وہ روس فرار ہو گئے، جس کے بعد ان کے خلاف یہ تاریخی قانونی کارروائی عمل میں لائی گئی ہے۔