میٹرو بس سروس بندش کا خطرہ ٹل گیا، ویڈا اور ماس ٹرانزٹ اتھارٹی میں اتفاق

لاہور میٹرو بس سروس کی معطلی کا خطرہ فی الحال ٹل گیا ہے اور اپریٹر کمپنی ’ویڈا‘ (VDA) اور پنجاب ماس ٹرانزٹ اتھارٹی کے درمیان سروسز جاری رکھنے پر اتفاق ہو گیا ہے۔ جنرل منیجر آپریشنز ماس ٹرانزٹ اتھارٹی عزیر شاہ کے مطابق اپریٹر کمپنی کے مالی اور دیگر مطالبات پر سنجیدگی سے غور کیا جا رہا ہے اور تمام معاملات کو باہمی رضامندی سے حل کرنے کے لیے مذاکرات کا سلسلہ جاری ہے۔ انہوں نے واضح کیا کہ میٹرو بس سروس حسبِ معمول بحال رہے گی اور مسافروں کو سفری سہولیات کی فراہمی میں کوئی تعطل نہیں آئے گا۔ کمپنی کے مطالبات کے حتمی حل اور پیشرفت کے لیے فریقین کے درمیان مذاکرات کا اگلا دور بھی طے پا گیا ہے۔