خیبر پختونخوا: دریا میں نہاتے ہوئے طالب علم سمیت 3 افراد ڈوب گئے

دریائے سندھ اور دریائے کابل میں نہانے کے دوران پیش آنے والے مختلف افسوسناک واقعات میں ایک 12 سالہ طالب علم سمیت تین افراد ڈوب کر جاں بحق ہو گئے۔

ریسکیو ذرائع کے مطابق انتظامیہ کی جانب سے دریاؤں میں نہانے پر سخت پابندی اور دفعہ 144 نافذ ہونے کے باوجود شہری قوانین کی خلاف ورزی کر رہے ہیں اور دریاؤں کا رخ کر رہے ہیں، جو ان جان لیوا حادثات کا سبب بن رہا ہے۔

ذرائع کا کہنا ہے کہ پہلا واقعہ سور پل کے مقام پر پیش آیا جہاں نوشہرہ کلاں کا رہائشی 12 سالہ طالب علم عمر دریائے سندھ میں نہاتے ہوئے گہرے پانی میں ڈوب گیا۔ اسی طرح ایک اور واقعے میں نظام پور کے علاقے ماما خیل میں بھی ایک نوجوان دریا کی بپھری لہروں کی نذر ہو کر جاں بحق ہو گیا۔ ڈوبنے کا تیسرا واقعہ اکبرپورہ کے علاقے گھڑی مومن میں پیش آیا، جہاں شعیب اللہ نامی نوجوان دریا میں نہانے کے دوران تیز لہروں کا مقابلہ نہ کر سکا اور ڈوب گیا۔

واقعات کی اطلاع ملتے ہی ریسکیو الیون ٹو ٹو (1122) کے غوطہ خور موقع پر پہنچ گئے اور ڈوبنے والے افراد کی تلاش کے لیے بڑے پیمانے پر سرچ آپریشن شروع کر دیا۔ تاہم، ریسکیو حکام کا کہنا ہے کہ دریائے سندھ اور کابل میں پانی کا بہاؤ انتہائی تیز ہونے کے باعث تاحال لاشوں کو دریا سے نہیں نکالا جا سکا، اور تلاش کا عمل جاری ہے۔