شاہراہ قراقرم ایک بار پھر بند ہوگئی

پٹن ڈاک کے مقام پر شدید لینڈ سلائیڈنگ (تودے گرنے) کے باعث شاہراہ قراقرم ہر قسم کی ٹریفک کے لیے بند ہو گئی ہے، جس کے نتیجے میں پاکستان اور چین کے مابین زمینی رابطہ عارضی طور پر منقطع ہو گیا ہے۔ شاہراہ کی بندش کی وجہ سے پاک چین بارڈر اور گلگت بلتستان کے دیگر علاقوں میں تفریح کے لیے آئے ہوئے سیاحوں کی ایک بڑی تعداد وہاں پھنس کر رہ گئی ہے۔

مقامی پولیس حکام کے مطابق، ملک کے مختلف حصوں سے گلگت بلتستان آنے اور یہاں سے واپس جانے والی گاڑیوں کی لمبی قطاریں لگ چکی ہیں اور متعدد مسافر سڑک پر محصور ہیں۔ پھنسے ہوئے مسافروں میں بچے، بوڑھے، خواتین اور طالب علم شامل ہیں جنہیں شدید مشکلات کا سامنا ہے۔ انتظامیہ کی جانب سے سڑک کی بحالی کے کام کے انتظار کے دوران، مسافروں نے اپنی مدد آپ کے تحت کوششیں کرتے ہوئے چھوٹی گاڑیوں کے گزرنے کے لیے عارضی راستہ بنانے کی کوشش کی ہے۔

شاہراہ قراقرم کی بندش کے باعث سڑک کے دونوں اطراف جہاں سیاحتی اور مسافر گاڑیوں کا شدید ٹریفک جام ہے، وہی تجارتی سامان سے لدی متعدد مال بردار گاڑیوں کی بھی لمبی قطاریں لگ گئی ہیں۔ مقامی انتظامیہ کا کہنا ہے کہ شاہراہ کو کلیئر کرنے اور ٹریفک کی بحالی کے لیے جلد ہی اقدامات شروع کیے جائیں گے۔