مفاہمتی یادداشت پر عملدرآمد مشکل ضرور ہے لیکن ناممکن نہیں، باقر قالیباف

ایرانی پارلیمنٹ کے اسپیکر محمد باقر قالیباف نے کہا ہے کہ امریکا کے ساتھ طے پانے والی مفاہمتی یادداشت پر عملدرآمد مشکل ضرور ہے لیکن یہ ناممکن نہیں ہے۔ انہوں نے زور دیا کہ ملک کو سفارت کاری کے ساتھ ساتھ اپنے دفاع کے لیے بھی ہر دم تیار رہنا ہو گا۔

تہران میں حماس کے رہنما اور شوریٰ کونسل کے چیئرمین محمد درویش سے اہم ملاقات کے دوران گفتگو کرتے ہوئے باقر قالیباف کا کہنا تھا کہ سفارت کاری کی میز پر ایسے فیصلے ہونے چاہئیں جن سے میدانِ جنگ اور جنگ بندی میں حاصل ہونے والی کامیابیوں کا حقیقی تحفظ ہو سکے۔

دوسری جانب، تہران میں اعلیٰ قیادت کی جانب سے سخت بیانات کا سلسلہ بھی جاری ہے۔ ایرانی سپریم لیڈر کے مشیر محسن رضائی نے اپنے ایک بیان میں واشگاف الفاظ میں کہا کہ “شہید رہبرِ اعلیٰ کے خون کا بدلہ ضرور لیا جائے گا”۔ انہوں نے ایرانی قوم کو اندرونی معاملات کے حوالے سے ہوشیار رہنے کی تاکید کرتے ہوئے کہا کہ ایران ناقابلِ شکست ہے جبکہ صہیونی ریاست تیزی سے زوال کی طرف جا رہی ہے، ہماری تہذیب اور عوام کو تسخیر نہیں کیا جا سکتا۔

اس سلسلے میں ایرانی فوج کے سربراہ (آرمی چیف) نے بھی میڈیا سے گفتگو کرتے ہوئے کڑے عزم کا اظہار کیا اور کہا کہ شہید رہبرِ اعلیٰ کو نشانہ بنانے والوں کا گریبان کسی صورت نہیں چھوڑا جائے گا۔ نو منتخب ایرانی صدر نے قوم سے وعدہ کیا کہ وہ شہید امام کے مشن کو پوری قوت کے ساتھ جاری رکھیں گے۔ مزید برآں، قدس فورس کے سربراہ اسماعیل قاآنی نے شہید رہبرِ اعلیٰ کی زندگی بھر کی جدوجہد کو خراجِ تحسین پیش کیا، جبکہ ایرانی نائب صدر نے واضح کیا کہ شہید سپریم لیڈر کے احکامات پر عملدرآمد کرنا ریاست کے تمام شعبوں کی اولین ذمہ داری ہے