اسرائیلی فوج کے سربراہ کا لبنان میں فیصلہ کن کارروائیاں جاری رکھنے کا اعلان

اسرائیل کے چیف آف جنرل اسٹاف لیفٹننٹ جنرل ایال زامر نے کہا ہے کہ اسرائیلی فوج لبنان سے لاحق خطرات کے خاتمے کے لیے فیصلہ کن انداز میں کارروائیاں جاری رکھے گی اور اگر جنگ بندی کی معمولی سی بھی خلاف ورزی ہوئی تو فوری طور پر دوبارہ جارحانہ کارروائیاں شروع کر دی جائیں گی۔

غیر ملکی خبر رساں ایجنسی کی رپورٹ کے مطابق، اسرائیل کی فوج (آئی ڈی ایف) کی جانب سے جاری بیان میں بتایا گیا ہے کہ اسرائیلی فوجی سربراہ جنرل ایال زامر نے جنوبی لبنان میں بیوفورٹ قلعے کے اطراف تعینات اپنی فوج کے فرنٹ لائن دستوں سے ملاقاتیں کیں۔ اس موقع پر فوجیوں سے گفتگو کرتے ہوئے انہوں نے حزب اللہ کے خلاف جاری مہم کو مزید آگے بڑھانے پر زور دیا۔

جنرل ایال زامر نے دعویٰ کیا کہ بیوفورٹ رج اور جنوبی لبنان میں اسرائیلی فوج کی موجودہ سرگرمیاں طے پانے والے معاہدے کے فریم ورک اور اس کے تحت قائم کیے گئے طریقہ کار کے مطابق انجام دی جا رہی ہیں۔ انہوں نے واضح کیا کہ اسرائیلی فوج یا شہریوں کو نشانہ بنانے والے کسی بھی خطرے کو فوری طور پر روکا جائے گا اور جوابی حملے کے ذریعے اسے مکمل ختم کر دیا جائے گا۔

اسرائیلی فوجی سربراہ نے لبنان کی مسلح افواج (لبنانی فوج) سے مطالبہ کیا کہ وہ اس تاریخی معاہدے کے تحت اپنی ذمہ داریاں پوری کرے اور جنوبی لبنان کے علاقے کو حزب اللہ کے جنگجوؤں سے مکمل طور پر پاک کرے۔

واضح رہے کہ حال ہی میں امریکا کی زیرِ نگرانی اسرائیل اور لبنان کے درمیان ایک نازک جنگ بندی معاہدے پر دستخط کیے گئے ہیں، جس میں دونوں ممالک نے ایک دوسرے کے خلاف کسی بھی قسم کی فوجی کارروائیاں نہ کرنے کا عہد کیا ہے۔ تاہم، اسرائیلی فوجی سربراہ کا یہ بیان ظاہر کرتا ہے کہ خطے میں تاحال شدید کشیدگی برقرار ہے۔