اسرائیل کی سفاکیت کم نہ ہوئی، ڈرون حملے میں مزید 2 فلسطینی شہید، متعدد زخمی

غزہ میں طے پانے والے جنگ بندی معاہدے کے باوجود اسرائیل کی سفاکیت اور عسکری کارروائیاں تھم نہ سکیں، جہاں اسرائیلی فوج کے تازہ ڈرون حملے میں مزید دو فلسطینی شہید اور متعدد شدید زخمی ہو گئے۔

غزہ کی ایمبولینس اور ہنگامی امدادی سروسز کے ذرائع کے مطابق، اسرائیلی فوج نے غزہ شہر کے مشرقی علاقے ‘السمر’ کو ڈرون حملے کا نشانہ بنایا۔ یہ حملہ ایک ایسے وقت میں کیا گیا جب علاقے میں جنگ بندی نافذ ہے، تاہم اسرائیل کی جانب سے اس معاہدے کی مسلسل خلاف ورزی کی جا رہی ہے۔

امدادی اہلکاروں نے فوری کارروائی کرتے ہوئے ڈرون حملے کے تمام زخمیوں اور شہدا کی لاشوں کو طبی و قانونی کارروائی کے لیے قریبی ہسپتالوں میں منتقل کر دیا ہے۔ ہسپتال ذرائع کا کہنا ہے کہ منتقل کیے گئے زخمیوں میں سے متعدد کی حالت انتہائی تشویشناک ہے، جس کے باعث شہدا کی تعداد میں اضافے کا خدشہ ہے۔

واضح رہے کہ بین الاقوامی سطح پر ہونے والے جنگ بندی معاہدے اور عالمی دباؤ کے باوجود اسرائیلی فورسز غزہ کے مختلف علاقوں میں مسلسل فضائی اور زمینی کارروائیاں جاری رکھے ہوئے ہیں، جس سے خطے میں امن کی کوششیں شدید خطرات سے دوچار ہو گئی ہیں۔