سہیل آفریدی کی ضم اضلاع میں عوامی خدمات بہتر بنانے کیلئے تین ماہ کی مہلت

وزیراعلیٰ خیبرپختونخوا محمد سہیل آفریدی نے ضم اضلاع (سابقہ فاٹا) میں سروس ڈیلیوری اور گورننس کو بہتر بنانے کے لیے متعلقہ انتظامیہ کو 3 ماہ کی حتمی ڈیڈ لائن دیتے ہوئے واضح کیا ہے کہ اس مدت کے دوران عوام کو خدمات کی فراہمی میں عملی تبدیلی نظر آنی چاہئے۔ ضم اضلاع میں امن و امان، ترقیاتی پروگراموں، تعلیم اور صحت کے منصوبوں پر پیش رفت کے جائزہ اجلاس کی صدارت کرتے ہوئے وزیراعلیٰ نے شمالی وزیرستان میں ایک ہفتے کے اندر ترقیاتی سرگرمیاں بحال کرنے اور درکار عملہ فوری فراہم کرنے کی ہدایت کی۔ انہوں نے بجٹ میں مختص خصوصی فنڈز کے ذریعے آؤٹ آف سکول بچوں کو تعلیمی دھارے میں لانے اور ہسپتالوں میں ڈاکٹروں کی کمی دور کرنے کے احکامات بھی جاری کیے۔ محمد سہیل آفریدی کا کہنا تھا کہ دہشت گردی کے خلاف جنگ میں فرنٹ لائن کا کردار ادا کرنے کی وجہ سے ضم اضلاع کو جدید اسلحہ اور آلات کی فراہمی میں پہلی ترجیح دی جا رہی ہے۔