ٹیک کمپنیاں کتابیں سکین کرنے کے بعد اصل نسخے ضائع کرنے لگیں

برطانوی میڈیا کی ایک تہلکہ خیز رپورٹ میں انکشاف کیا گیا ہے کہ دنیا کی بڑی ٹیک کمپنیاں آرٹیفیشل انٹیلی جنس (AI) کے جدید ماڈلز کی تربیت (ٹریننگ) کے لیے پرانی اور نایاب کتابیں بڑے پیمانے پر خرید کر انہیں تیز رفتار مشینوں سے اسکین کر رہی ہیں، جبکہ اس عمل کے بعد ان کتابوں کے اصل نسخوں کو تلف اور ضائع کیا جا رہا ہے۔ رپورٹ کے مطابق اس متنازع منصوبے کا آغاز فروری 2024 میں اس وقت ہوا جب ایک معروف اے آئی کمپنی نے عالمی سطح پر زیادہ سے زیادہ کتب حاصل کرنے کے لیے ایک عملہ تعینات کیا۔ کمپنیاں خصوصاً 2022 سے قبل شائع ہونے والی کتب کی تلاش میں ہیں تاکہ مصنوعی طور پر تیار کردہ (AI-generated) مواد کے بجائے خالص انسانی علم اور مواد کا استعمال کیا جا سکے۔ ماہرین نے اس عمل کو شدید تنقید کا نشانہ بناتے ہوئے خبردار کیا ہے کہ اسکیننگ کے نام پر تاریخی و نایاب نسخوں کا خاتمہ انسانی علم، تاریخ اور ثقافتی ورثے کے لیے ایک ناقابلِ تلافی نقصان ہے۔