کانٹینٹ کریئیٹرز کی دیرینہ خواہش پوری، یوٹیوب نے اہم فیچر متعارف کرا دیا

معروف ویڈیو شیئرنگ پلیٹ فارم ‘یوٹیوب’ نے کانٹینٹ کریئیٹرز کے لیے یوٹیوب شارٹس میں کسٹم تھمب نیلز (Custom Thumbnails) اپ لوڈ کرنے کا نیا اور اہم فیچر متعارف کرا دیا ہے۔ میڈیا رپورٹس کے مطابق اس سہولت کے تحت یوٹیوب پارٹنر پروگرام (YPP) سے منسلک تخلیق کار اب ویڈیو کے اندرونی فریم پر انحصار کرنے کے بجائے اپنی مرضی کی تیار کردہ دلکش تصویر بطور تھمب نیل استعمال کر سکیں گے۔ یوٹیوب انتظامیہ کے مطابق کسٹم تھمب نیلز کی فراہمی کریئیٹرز کا دیرینہ اور سب سے زیادہ کیا جانے والا مطالبہ تھا، جس سے نہ صرف چینل کی پیشہ ورانہ برانڈنگ برقرار رکھنے میں مدد ملے گی بلکہ ناظرین کی توجہ حاصل کر کے ویوز میں بھی اضافہ ممکن ہوگا۔ ابتدائی طور پر پارٹنر پروگرام کا حصہ بننے والے صارفین کو یہ فیچر دستیاب ہوگا، جسے جلد تمام کریئیٹرز تک توسیع دی جائے گی۔