اسرائیلی فوج میں نظم و ضبط کی خلاف ورزی، 14 اہلکار برطرف، قید کی سزا

اسرائیلی فوج نے بغاوت اور نظم و ضبط کی سنگین خلاف ورزی کے خدشے کے پیش نظر گیواتی بریگیڈ کی ‘ٹزابر بٹالین’ کے 14 اہلکاروں کو جنگی ڈیوٹی سے مستقل طور پر برطرف کرتے ہوئے 30 دن کے لیے فوجی جیل بھیج دیا ہے۔ الجزیرہ کے مطابق یہ واقعہ جنوبی اسرائیل کے ‘سدی تیمان’ فوجی اڈے پر پیش آیا، جہاں کمانڈ اسٹاف کی جانب سے کمپنیوں کے نشانات ہٹانے کے فیصلے پر فوجیوں کا سینئر کمانڈر سے شدید تنازع ہوا، جس کے بعد درجنوں اہلکاروں نے ہتھیار رکھ کر اجتماعی طور پر اڈے سے واک آؤٹ کر دیا۔ اسرائیلی فوج نے تصدیق کی ہے کہ گیواتی بریگیڈ کے کمانڈر نے اس نظم و ضبط کی خلاف ورزی پر ملوث اہلکاروں کو جنگی ذمہ داریوں سے ہٹا دیا ہے۔ رپورٹس کے مطابق اس سے قبل بھی سدی تیمان اڈے پر تعینات اہلکاروں پر فلسطینی قیدیوں کے ساتھ شدید ناروا سلوک اور قوانین کی خلاف ورزی کے الزامات عائد کیے جا چکے ہیں۔