بلوچستان کے مسائل کا حل علیحدگی پسندی یا تشدد نہیں: سینیٹر انوارالحق کاکڑ

سابق وزیراعظم و سینیٹر انوارالحق کاکڑ نے کہا ہے کہ بلوچستان کے درپیش مسائل کا پائیدار حل کسی بھی قسم کی علیحدگی پسندی یا تشدد میں نہیں، بلکہ آئینی، سیاسی، انتظامی اور ترقیاتی ذرائع کے مؤثر اور باقاعدہ استعمال میں مضمر ہے۔

آئی ایس پی آر سمر انٹرن شپ پروگرام 2026 کے تحت منعقدہ ایک خصوص نشست میں سینیٹر انوارالحق کاکڑ نے ملک بھر کے 21 مختلف اسٹیشنز سے آن لائن و بالمشافہ جڑے 6 ہزار 150 سے زائد طلبہ و طالبات سے تفصیلی خطاب کیا۔ اس موقع پر انہوں نے بلوچستان کی تاریخ، علیحدگی پسندانہ بیانیے، قومی سلامتی، انسانی حقوق کی پاسداری اور بالخصوص ریاست کی بقا و ترقی میں نوجوانوں کے کلیدی کردار پر سیر حاصل گفتگو کی۔

نوجوانوں پر زور دیتے ہوئے سینیٹر کاکڑ کا کہنا تھا کہ بلوچستان میں متحرک علیحدگی پسند اور دہشت گرد تنظیمیوں کی سیاسی حکمتِ عملی کا اصل محور محض تشدد ہے۔ انہوں نے واضح کیا کہ “فتنہ الہندوستان” کے دہشت گردوں کا ڈٹ کر مقابلہ کرنا اور ان کے نیٹ ورکس کا مکمل خاتمہ کرنا قومی ترجیح ہے۔ انہوں نے جعفر ایکسپریس کے بے گناہ مسافروں، موسیٰ خیل کے عام شہریوں اور تربت میں محنت کش مزدوروں پر ہونے والے بزدلانہ حملوں کی شدید مذمت کرتے ہوئے انہیں انسانی حقوق اور بنیادی حقِ زندگی کی سنگین پامالی قرار دیا۔ انہوں نے نوجوانوں کو ہدایت کی کہ وہ دلیل، علم، ابلاغ اور فکری بصیرت کی طاقت سے ریاست مخالف بیانیوں کا مؤثر توڑ کریں۔