کوئٹہ سے دیگر صوبوں کو جانے والی ٹرین سروس ایک روز کیلئے معطل

بلوچستان سے دیگر صوبوں کو جانے والی ٹرین سروس سیکیورٹی وجوہات اور خدشات کے پیشِ نظر ایک روز کے لیے معطل کر دی گئی ہے۔

ریلوے انتظامیہ کے مطابق کوئٹہ سے پشاور جانے والی ‘جعفر ایکسپریس’ آج اپنے مقررہ وقت پر روانہ نہیں ہوگی، جبکہ پشاور سے کوئٹہ کے لیے آنے والی جعفر ایکسپریس کو جیکب آباد ہی میں روک دیا جائے گا۔ ریلوے ذرائع نے بتایا ہے کہ یہ فیصلہ علاقے میں سیکیورٹی کی موجودہ صورتحال کو مدنظر رکھتے ہوئے مسافروں اور ٹرین عملے کے تحفظ کے پیشِ نظر کیا گیا ہے۔

حکام کا کہنا ہے کہ مسافروں کو درپیش مشکلات کا احساس ہے اور صورتحال کا مسلسل جائزہ لیا جا رہا ہے۔ سیکیورٹی کلیئرنس ملتے ہی اور حالات بہتر ہوتے ہی ٹرین سروس کو معمول کے مطابق بحال کر دیا جائے گا۔