کھانے اضافی نمک ڈالنا کس خطرناک مسئلے سے تعلق رکھتا ہے؟

چینی سائنس دانوں نے اپنی ایک حالیہ تحقیق میں انکشاف کیا ہے کہ کھانوں میں بار بار اضافی نمک شامل کرنے کی عادت ذہنی صحت کے لیے سنگین خطرہ بن سکتی ہے اور اس سے ڈپریشن کے امکانات میں نمایاں اضافہ ہوتا ہے۔ سائنسی جریدے ‘نیوٹریشنل نیوروسائنس’ میں شائع ہونے والے اس مطالعے میں 15 ہزار سے زائد افراد کی غذائی عادات کا باریک بینی سے جائزہ لیا گیا، جس کے نتائج کے مطابق زیادہ نمک استعمال کرنے والوں میں ڈپریشن کا شکار ہونے کا خطرہ 26 فیصد زیادہ دیکھا گیا۔

گوانگ ڈونگ پروونشل پیپلز ہاسپٹل کے محققین کا کہنا ہے کہ اگرچہ نمک اور ڈپریشن کے تعلق کی حتمی وجوہات پر مزید کام جاری ہے، تاہم ابتدائی شواہد بتاتے ہیں کہ نمک کی زیادتی جسم کے اسٹریس مینیجمنٹ سسٹم کو حد سے زیادہ متحرک کر دیتی ہے، جس سے اسٹریس ہارمونز کی پیداوار بڑھ جاتی ہے۔ اس کے علاوہ، نمک کا زیادہ استعمال جسم اور دماغ میں سوزش (انفلیمیشن) پیدا کرنے کا باعث بن سکتا ہے، جو انسانی جذبات اور مزاج کو کنٹرول کرنے والے دماغی حصوں پر منفی اثرات مرتب کرتی ہے۔ طبی ماہرین نے مشورہ دیا ہے کہ ذہنی و جسمانی توازن برقرار رکھنے کے لیے روزمرہ خوراک میں نمک کی مقدار کو کم رکھا جائے۔