حکومت مطالبات ماننے کو تیار نہیں، 20 ستمبر کو اسلام آباد مارچ کریں گے: حافظ نعیم الرحمان

امیر جماعتِ اسلامی حافظ نعیم الرحمان نے اعلان کیا ہے کہ حکومت بجلی کی قیمتوں، مہنگائی اور ٹیکسوں کے معاملے پر ان کے مطالبات ماننے سے مسلسل انکاری ہے، جس کے باعث 20 ستمبر کو ملک بھر سے عوام کا سمندر اسلام آباد کی جانب مارچ کرے گا۔ لاہور میں ایک عظیم الشان جلسہ عام سے خطاب کرتے ہوئے حافظ نعیم الرحمان نے واضح کیا کہ جب جماعتِ اسلامی کے قافلے اسلام آباد کے لیے نکلیں گے تو وہ ہر صورت وہاں پہنچ کر دم لیں گے، کیونکہ حکومت پٹرولیم لیوی اور ظالمانہ ٹیکسوں کے ذریعے عوام پر مسلسل اضافی بوجھ ڈال رہی ہے۔

انہوں نے انکشاف کیا کہ جماعتِ اسلامی اور حکومت کے درمیان اب تک مذاکرات کے 4 ادوار ہو چکے ہیں، تاہم حکومت اپنے وعدوں پر عمل درآمد اور مطالبات تسلیم کرنے کے لیے تیار نہیں۔ مذاکراتی نشستوں میں سرکاری وفد کے پاس جماعتِ اسلامی کے مؤقف کا کوئی مؤثر جواب موجود نہیں تھا۔ امیر جماعت نے بتایا کہ 20 ستمبر کے اسلام آباد مارچ میں ملک کے کونے کونے سے قافلے شریک ہوں گے۔ کراچی، کوئٹہ، چترال، کالام اور پنجاب بھر سے عوام روانہ ہوں گے جبکہ کراچی سے خصوصی ‘ٹرین مارچ’ ملتان اور لاہور سے ہوتا ہوا اسلام آباد پہنچے گا۔ حافظ نعیم الرحمان نے پٹرولیم لیوی ختم کرنے اور پٹرولیم مصنوعات کی قیمتوں میں مزید ریلیف دینے کا مطالبہ بھی دہرایا۔