شہداء کی قربانیوں کو سلام، قوم کو وطن کے بہادر بیٹوں پر ناز ہے: محسن نقوی

وفاقی وزیرِ داخلہ محسن نقوی نے خیبر پختونخوا کے اضلاع شمالی وزیرستان اور ہنگو میں خوارجی دہشت گردوں کے خلاف کامیاب کارروائیوں پر سیکیورٹی فورسز کو زبردست خراجِ تحسین پیش کیا ہے۔ اپنے ایک بیان میں وزیرِ داخلہ نے 10 خوارجیوں کو جہنم واصل کرنے پر مسلح افواج اور سیکیورٹی اداروں کی پیشہ ورانہ صلاحیتوں، فوری ردِعمل اور جرات کو سراہا۔

محسن نقوی نے سیکیورٹی فورسز کے قافلے پر ہونے والے حملے کے دوران جامِ شہادت نوش کرنے والے 6 بہادر سپوتوں کو عقیدت کا سلام پیش کیا اور شہدا کے غمزدہ خاندانوں سے دلی ہمدردی و تعزیت کا اظہار کیا۔ انہوں نے تاکید کی کہ ارضِ وطن کے امن کی خاطر اپنی جانوں کا نذرانہ پیش کرنے والے ان بہادر بیٹوں کی قربانیاں ہرگز رائیگاں نہیں جائیں گی اور پوری قوم کو اپنے ان شہدا اور سیکیورٹی فورسز پر بے حد فخر ہے۔