پاکستانی طالبہ کی شائستہ روسی زبان نے سرگئی لاوروف کو متاثر کردیا

روس کے وزیرِ خارجہ سرگئی لاوروف نے بین الاقوامی یوتھ فیسٹیول کے دوران روسی زبان میں روانی سے سوال کرنے والی پاکستانی طالبہ کی کیمرے کے سامنے دل کھول کر تعریف کی ہے۔ انہوں نے کہا کہ روس میں منعقد ہونے والی مختلف بین الاقوامی اور نوجوانوں کی تقریبات میں پاکستان کے نمائندوں کی شرکت پر ہمیشہ خوشی ہوگی، بالخصوص ایسے پاکستانی نوجوانوں کی آمد کا خیرمقدم کیا جائے گا جو اتنی شائستہ، خوبصورت اور صاف روسی زبان بولتے ہیں۔

یہ دلکش مکالمہ یکتیرنبرگ میں منعقدہ بین الاقوامی یوتھ فیسٹیول کے تحت ایک اہم نشست ‘دنیا کا نیا ڈھانچہ: سرگئی لاوروف کے ساتھ کھلا مکالمہ’ کے دوران پیش آیا۔ روس کی ‘کراسنویارسک یونیورسٹی’ میں زیرِ تعلیم پاکستانی طالبہ نے روسی وزیرِ خارجہ سے براہِ راست روسی زبان میں سوال کیا کہ روس میں تعلیم حاصل کرنے والے غیر ملکی طلبہ عالمی تعلقات کو بہتر بنانے میں کس طرح کردار ادا کر سکتے ہیں۔ اس پر سرگئی لاوروف نے مسکراتے ہوئے جواب دیا کہ آپ اس وقت روسی زبان بول کر اور اس مکالمے میں حصہ لے کر یہی اہم کردار ادا کر رہی ہیں۔

نشست میں روس سمیت دنیا بھر کے مختلف ممالک کے نوجوانوں نے شرکت کی اور عالمی سیاست، سفارت کاری اور بین الاقوامی تعاون پر سوالات کیے۔ روسی وزیرِ خارجہ نے امید ظاہر کی کہ فیسٹیول کے منتظمین روس میں ہر سال منعقد ہونے والی تمام یوتھ کانفرنسز کی فہرست شرکا کو فراہم کریں گے تاکہ پاکستانی طلبا اور دیگر ممالک کے نمائندے ان میں بڑھ چڑھ کر حصہ لے سکیں۔