امریکی صدر کی ایک بار پھر ایران کو بڑے پیمانے پر حملے کی دھمکی

امریکی صدر ڈونلڈ ٹرمپ نے ایران کو ایک بار پھر بڑے پیمانے پر حملوں کی کھلی دھمکی دیتے ہوئے انکشاف کیا ہے کہ ایران کے خلاف جاری جنگ اب ایک انتہائی اہم اور حساس مرحلے میں داخل ہو چکی ہے۔ معروف امریکی نیوز ویب سائٹ ‘ایگزیوس’ (Axios) کو دیے گئے ایک انٹرویو میں صدر ٹرمپ نے کہا کہ وہ جنگ کے فوری خاتمے کو یقینی بنانے کے لیے ایران پر دوبارہ وسیع پیمانے پر عسکری حملے شروع کرنے پر سنگینی سے غور کر رہے ہیں۔ انہوں نے دعویٰ کیا کہ اس شدید دباؤ کے باوجود ایرانی حکام امریکہ کے ساتھ براہِ راست رابطے میں ہیں اور اب بھی واشنگٹن کے ساتھ ایک نیا معاہدہ طے کرنے کی خواہش رکھتے ہیں۔

امریکی صدر نے مزید بتایا کہ وہ ایران جنگ کے اگلے اور ممکنہ حتمی مرحلے کی حکمتِ عملی طے کرنے کے سلسلے میں خطے کے خلیجی اتحادیوں کا موقف اور رائے جاننے کے خواہا ں ہیں۔ اس مقصد کے لیے وہ جلد ہی سعودی عرب، متحدہ عرب امارات (UAE)، قطر، بحرین، کویت اور عمان کے سربراہان اور رہنماؤں سے اہم ملاقاتیں کریں گے۔

صدر ٹرمپ نے ایران کی معاشی ناکہ بندی کا ذکر کرتے ہوئے کہا کہ امریکہ کی جانب سے کی جانے والی شدید بحری ناکہ بندی (Naval Blockade) کے باعث ایران کے لیے خام تیل کی عالمی برآمدات تقریباً ناممکن ہو چکی ہیں۔ انہوں نے دعویٰ کیا کہ جب بھی ایران نے متبادل طریقوں سے تیل برآمد کرنے کی کوشش کی، امریکی فوج نے فوری کارروائی کرتے ہوئے ان کی تیل بردار بحری جہازوں کو تباہ کر دیا۔