امریکا نے ایرانی رہنماؤں کو ویزے جاری کرنے کی منظوری دیدی

امریکہ نے نیویارک میں ہونے والے اقوامِ متحدہ کی جنرل اسمبلی کے سالانہ اجلاس میں شرکت کے لیے ایرانی رہنماؤں اور وفد کے ارکان کو ویزے جاری کرنے کی منظوری دے دی ہے۔ امریکی محکمہ خارجہ کے ترجمان کے مطابق ایرانی وفد آئندہ ہفتے نیویارک میں منعقد ہونے والے اس اعلیٰ سطحی عالمی اجلاس میں اپنے ملک کی نمائندگی کرے گا۔

امریکی حکام نے واضح کیا ہے کہ ویزوں کی منظوری کے باوجود ایرانی وفد کو نیویارک میں شدید سفری پابندیوں اور سخت محدودیت کا سامنا رہے گا۔ امریکی پالیسی کے تحت ایرانی وفد کے ارکان کو لگژری سامان اور بعض دیگر مخصوص اشیا خریدنے کی بھی بالکل اجازت نہیں ہوگی۔ علاوہ ازیں، ترجمان نے یہ بات بھی واضح کی ہے کہ اس سال اقوامِ متحدہ کے اجلاس میں شرکت کرنے والا ایرانی وفد گزشتہ سال کے مقابلے میں کافی مختصر اور محدود رکھا گیا ہے۔