ملک بھر میں 20 ستمبر کو ایم ڈی کیٹ کا انعقاد: 1 لاکھ 38 ہزار سے زائد طلبہ امتحان دیں گے، وفاقی وزیر صحت مصطفیٰ کمال

وفاقی وزیر صحت مصطفیٰ کمال نے اعلان کیا ہے کہ ملک بھر میں میڈیکل اینڈ ڈینٹل کالج ایڈمیشن ٹیسٹ (MDCAT) کا انعقاد 20 ستمبر کو ہونے جا رہا ہے۔ پریس کانفرنس سے خطاب کرتے ہوئے انہوں نے بتایا کہ پاکستان میڈیکل اینڈ ڈینٹل کونسل (PMDC) نے امتحانی شفافیت اور انتظامات سے متعلق اپنے تمام امور بروقت اور احسن طریقے سے مکمل کر لیے ہیں۔ اس سال کل 1 لاکھ 38 ہزار 160 امیدوار ایم ڈی کیٹ کے امتحان میں شرکت کریں گے۔

امتحانی مراکزی کی تفصیلات بتاتے ہوئے وفاقی وزیر نے کہا کہ ٹیسٹ کے انعقاد کے لیے پاکستان بھر میں 34 امتحانی سینٹرز قائم کیے گئے ہیں، جبکہ سعودی عرب میں مقیم پاکستانی طلبہ کی سہولت کے لیے ایک سینٹر ریاض میں بھی بنایا گیا ہے۔ اس کے علاوہ آزاد کشمیر سے تعلق رکھنے والے امیدواروں کی آسان رسائی کے لیے اسلام آباد میں بھی خصوصی سینٹر قائم کیا گیا ہے۔ پرچے کی شفافیت کے لیے 8 ہزار سوالات پر مشتمل ایک جدید ‘کوئسچن بنک’ تیار کیا گیا ہے۔

امتحانی نظم و ضبط کے حوالے سے مصطفیٰ کمال کا کہنا تھا کہ گزشتہ برس امتحان سے متعلق صرف 6 معمولی شکایات موصول ہوئی تھیں اور تمام شکایت کنندگان کو مکمل طور پر مطمئن کر دیا گیا تھا۔ انہوں نے واضح کیا کہ اس بار امتحانی امور کی تمام تر عملی ذمہ داری متعلقہ صوبائی حکومتوں کو سونپی گئی ہے، جس کے باعث اگر کہیں بھی کوئی مسئلہ پیش آتا ہے تو اس کا اثر صرف اسی مخصوص صوبے تک ہی محدود رہے گا۔