امریکا کی سعودی عرب کو 48 جدید ایف 35 جنگی طیارے فروخت کرنے کی منظوری

امریکی محکمہ خارجہ نے مشرقِ وسطیٰ میں دفاعی تعاون کی توسیع کی سمت ایک بڑا پیشرفت کرتے ہوئے سعودی عرب کو 48 جدید ایف-35 (F-35) اسٹیلتھ جنگی طیاروں اور متعلقہ ملٹری آلات کی فروخت کی باضابطہ منظوری دے دی ہے۔ امریکی حکام کے مطابق 24.3 ارب ڈالر کی اس خطیر اور تاریخی مجوزہ ڈیل میں 48 جنگی طیارے، 49 پراٹ اینڈ وٹنی (Pratt & Whitney) انجن، جدید مواصلاتی نظام، اسپیئر پارٹس اور دیگر تکنیکی و دفاعی سامان شامل ہوگا۔

امریکی محکمہ خارجہ کی جانب سے جاری کردہ بیان میں کہا گیا ہے کہ یہ مجوزہ فروخت سعودی عرب کے ملکی دفاع کو مزید مضبوط بنا کر موجودہ اور مستقبل کے سیکیورٹی خطرات سے موثر انداز میں نمٹنے کی صلاحیت میں اضافہ کرے گی۔ اس کے ساتھ ساتھ اس سے امریکی افواج اور سعودی عرب کے درمیان باہمی ہم آہنگی، تزویراتی تعاون اور عسکری تعلقات کو بھی نئی وسعت ملے گی۔ واضح رہے کہ سعودی عرب نے سال 2025ء کے آغاز میں امریکی صدر ڈونلڈ ٹرمپ سے براہِ راست درخواست کی تھی کہ اسے جدید ترین ایف-35 اسٹیلتھ طیارے فراہم کیے جائیں۔