وزیراعظم کی 3 ماہ میں پمز ہسپتال میں فائر سیفٹی سمیت نظام بہتر کرنے کی ہدایت

وزیراعظم محمد شہباز شریف نے پاکستان انسٹیٹیوٹ آف میڈیکل سائنسز (پمز) ہسپتال میں فائر سیفٹی سسٹم اور انتظامی امور کو اگلے 3 ماہ میں مکمل طور پر بہتر بنانے کی سخت ہدایت جاری کر دی ہے۔ وزیراعظم کی زیر صدارت پمز ہسپتال کی بہتری اور وزارت قومی صحت کے پرفارمنس آڈٹ کا جائزہ اجلاس منعقد ہوا۔ اجلاس کے دوران بتایا گیا کہ پمز کے پرفارمنس آڈٹ میں 90 فیصد کے درکار ہدف کے مقابلے میں صرف 39.7 فیصد کمپلائنس پائی گئی، جس پر وزیراعظم نے انکوائری رپورٹ کی روشنی میں فوری طور پر 37 مجوزہ شارٹ ٹرم اقدامات پر عملدرآمد یقینی بنانے کی ہدایت کی۔

اجلاس میں وزیراعظم نے پمز کے فائر سیفٹی نظام کی بحالی کے لیے پاکستان کڈنی اینڈ لیور انسٹیٹیوٹ (PKLI) سے فنی معاونت لینے اور عالمی ادارہ صحت (WHO) کی تجاویز پر مکمل عملدرآمد کرنے کے احکامات جاری کیے۔ انہوں نے کہا کہ ہسپتال میں ادویات اور طبی سہولیات کی مفت فراہمی یقینی بنائی جائے اور اچھی شہرت کی حامل پیشہ ورانہ افرادی قوت تعینات کی جائے۔ اس کے ساتھ ہی وزیراعظم نے پولی کلینک ہسپتال کا آڈٹ کر کے بے ضابطگیاں دور کرنے اور اس کی ازسرنو تنظیمِ نو کا لائحہ عمل بھی طلب کر لیا۔

وزیراعظم نے کیپٹل ڈیولپمنٹ اتھارٹی (CDA) اور متعلقہ اداروں کو احکامات جاری کیے کہ اسلام آباد کے تمام سرکاری و نجی ہسپتالوں، دفاتر اور کمرشل عمارتوں میں فائر سیفٹی کا فوری آڈٹ کیا جائے اور حفاظتی ضوابط پر سختی سے عملدرآمد کرایا جائے۔ اجلاس میں وفاقی وزراء اعظم نذیر تارڑ، احد چیمہ، عطا اللہ تارڑ، مصطفیٰ کمال، معاونِ خصوصی ڈاکٹر مختار احمد بھرتھ اور دیگر اعلیٰ حکام نے شرکت کی۔