4 روزہ کاروباری ہفتہ، پاکستان اسٹاک ایکسچینج میں 2 دن تیزی 2 دن مندی رہی

کراچی: پاکستان اسٹاک ایکسچینج میں رواں چار روزہ کاروباری ہفتے کے دوران اتار چڑھاؤ کا سلسلہ برقرار رہا، جہاں مارکیٹ میں دو دن تیزی اور دو دن مندی کا رجحان دیکھا گیا۔ ہفتہ وار رپورٹ کے مطابق، کے ایس ای (KSE) 100 انڈیکس مجموعی طور پر 1,032 پوائنٹس کی کمی کے بعد 1 لاکھ 51 ہزار 707 کی سطح پر بند ہوا۔

کاروباری ہفتے کے دوران مارکیٹ میں شدید ہیجان (Volatility) دیکھا گیا اور انڈیکس 7,128 پوائنٹس کے وسیع بینڈ کے درمیان گردش کرتا رہا۔ اس دوران انڈیکس نے اپنی ہفتہ وار بلند ترین سطح 1,58,586 کو چھوا، جبکہ مندی کے دباؤ کے باعث کم ترین سطح 1,51,457 تک بھی گرا۔

معاشی ماہرین کا کہنا ہے کہ خطے میں جاری کشیدگی اور عالمی منڈیوں کے اثرات کے باعث سرمایہ کاروں نے محتاط رویہ اختیار کیا، جس کی وجہ سے انڈیکس اپنی بلند ترین سطح برقرار نہ رکھ سکا اور ہفتے کے اختتام پر منفی زون میں بند ہوا۔