ضرورت پڑنے پر امریکی فوج کو ایران کے تمام علاقے مکمل تباہ کرنے کے احکامات دیے جا چکے: ٹرمپ

امریکی صدر ڈونلڈ ٹرمپ نے ایران کو سخت ترین الفاظ میں خبردار کرتے ہوئے دعویٰ کیا ہے کہ امریکا کے ایک ہزار میزائلوں نے ایران کو ہدف بنا رکھا ہے۔ سوشل میڈیا پلیٹ فارم پر جاری اپنے ایک بیان میں ڈونلڈ ٹرمپ نے لکھا کہ ایران کی اسلامی جمہوریہ کی جانب ایک ہزار میزائل ہدف بنا کر تیار رکھے گئے ہیں، جو انہیں قتل کرنے یا قتل کی کوشش کرنے کی صورت میں فوری داغ دیئے جائیں گے، اور اس کے بعد مزید ہزاروں میزائل بھی چلائے جائیں گے۔ امریکی صدر نے واضح کیا کہ اگر ایرانی حکومت نے انہیں نقصان پہنچانے کی کوشش کی تو امریکا فوری اور فیصلہ کن کارروائی کرے گا، اور امریکی فوج کو ایک سال تک ایران کے تمام علاقوں کو تباہ کرنے کے احکامات دیے جا چکے ہیں۔

ٹرمپ نے مزید کہا کہ امریکا ہر قسم کی فوجی کارروائی کے لیے مکمل طور پر تیار، بااختیار اور قادر ہے، اور ایران کی کسی بھی جارحیت کا بھرپور جواب دیا جائے گا۔ دوسری جانب، امریکی نیوز گروپ ’ایگزیوس‘ نے دعویٰ کیا ہے کہ اس شدید کشیدگی کے باوجود امریکا اور ایران کے درمیان آئندہ ہفتے مذاکرات متوقع ہیں۔ یہ پیش رفت ایک ایسے وقت میں سامنے آئی ہے جب ایرانی وزیر خارجہ عباس عراقچی نے حال ہی میں بیان دیا تھا کہ ایران نے جنگ بندی معاہدے پر اپنے تمام وعدے پورے کیے ہیں جبکہ امریکا اس کی مسلسل خلاف ورزی کر رہا ہے۔