ایران نے اقوام متحدہ سے امریکا کے احتساب کا مطالبہ کر دیا

اقوام متحدہ میں ایران کے مستقل مندوب امیر سعید ایروانی نے امریکا پر بین الاقوامی قوانین کی سنگین خلاف ورزیوں کا الزام عائد کرتے ہوئے اقوام متحدہ سے مطالبہ کیا ہے کہ وہ واشنگٹن کو اس کے اقدامات پر جوابدہ ٹھہرائے۔ اقوام متحدہ کی سلامتی کونسل کے ہنگامی اجلاس سے خطاب کرتے ہوئے ایرانی مندوب نے واضح کیا کہ امریکا اپنے تمام غیر قانونی اقدامات کے قانونی اور سیاسی نتائج کا مکمل طور پر بین الاقوامی ذمہ دار ہے۔ امیر سعید ایروانی نے سلامتی کونسل پر زور دیا کہ اقوام متحدہ کو امریکا کی غیر قانونی جارحیت روکنے کے لیے فوری، مؤثر اور فیصلہ کن اقدامات کرنے چاہئیں، اور اس بات کو یقینی بنانا چاہیے کہ امریکا اپنی تمام بین الاقوامی ذمہ داریوں اور وعدوں کی مکمل پاسداری کرے۔