پاکستان نے ایل این جی کا ایک اور سپاٹ کارگو حاصل کر لیا

پاکستان نے جولائی کے وسط میں ملک کے اندر گیس کی بلاتعطل فراہمی کو یقینی بنانے کے لیے اسپاٹ مارکیٹ سے ایک اور ایل این جی کارگو خرید لیا ہے۔ سرکاری کمپنی پاکستان ایل این جی لمیٹڈ (پی ایل ایل) نے پبلک پروکیورمنٹ ریگولیٹری اتھارٹی (PPRA) کے قوانین کے تحت سب سے کم بولی دینے والی کمپنی ‘برٹش پیٹرولیم (بی پی) سنگاپور’ کو 1 لاکھ 40 ہزار مکعب میٹر ایل این جی کارگو کا ٹھیکہ دے دیا ہے۔ بی پی سنگاپور نے فی ایم ایم بی ٹی یو 18.2345 ڈالر کی سب سے کم بولی دے کر یہ ٹینڈر حاصل کیا، جبکہ پیٹرو چائنا نے 18.5991 ڈالر اور ٹوٹل انرجیز نے 18.7200 ڈالر کی بولیاں جمع کرائی تھیں۔ یہ کارگو 15 اور 16 جولائی کو پورٹ قاسم کے پی جی پی سی ایل ٹرمینل پر پہنچے گا، جس کے بعد رواں سال اسپاٹ مارکیٹ سے آنے والے کارگوز کی تعداد 5 ہو جائے گی۔ دوسری جانب، 11 جولائی کو ٹوٹل انرجیز کا کارگو بردار جہاز ‘ایس کے ریزولیوٹ’ بھی پورٹ قاسم پہنچ رہا ہے۔ رپورٹ کے مطابق قطر انرجی کے ساتھ طویل المدتی حکومتی معاہدے کے تحت بھی اب تک 5 کارگوز پاکستان پہنچ چکے ہیں جو خام تیل (برینٹ) کی قیمت کے 13.37 فیصد فارمولے کے تحت اسپاٹ مارکیٹ سے نمایاں طور پر سستے ہیں۔ بی پی سنگاپور کے اس کارگو کی آمد کے بعد رواں سال پاکستان کی مجموعی ایل این جی درآمدات 10 کارگوز تک پہنچ جائیں گی۔