پاکستان سٹاک مارکیٹ میں تیزی، کاروبار کا مثبت رجحان رہا

پاکستان اسٹاک ایکسچینج (PSX) میں کاروباری ہفتے کے پانچویں اور آخری روز زبردست تیزی کا رجحان دیکھا گیا، جہاں ہنڈرڈ انڈیکس میں مجموعی طور پر 982 پوائنٹس کا نمایاں اضافہ ریکارڈ کیا گیا۔ آج کاروبار کے آغاز پر ہی مارکیٹ میں زبردست تیزی دیکھنے میں آئی اور ایک وقت میں انڈیکس 1800 سے زائد پوائنٹس کی ریکارڈ چھلانگ لگا کر ایک لاکھ 83 ہزار 477 پوائنٹس کی بلند ترین سطح پر پہنچ گیا تھا۔ اگرچہ بعد میں پرافٹ ٹیکنگ کے باعث انڈیکس میں کچھ کمی آئی، تاہم مارکیٹ کا مثبت رجحان آخر تک برقرار رہا اور کاروباری روز کے اختتام پر ہنڈرڈ انڈیکس ایک لاکھ 82 ہزار 241 پوائنٹس کی سطح پر بند ہوا۔ واضح رہے کہ گزشتہ کاروباری دن مارکیٹ مندی کا شکار رہی تھی اور انڈیکس 369 پوائنٹس کی کمی کے ساتھ ایک لاکھ 81 ہزار 259 پوائنٹس کی سطح پر بند ہوا تھا، تاہم آج سرمایہ کاروں کے اعتماد کی بحالی سے مارکیٹ نے شاندار واپسی کی ہے۔