بجلی کے بریک ڈاؤن اور لوڈشیڈنگ کا خاتمہ؛ ترسیلی نظام کو جدید بنانے کے لیے ورلڈ بینک کی 37 کروڑ 59 لاکھ ڈالرز کی منظوری

عالمی بینک (ورلڈ بینک) نے پاکستان میں بجلی کے ترسیلی نیٹ ورک کو مضبوط اور جدید بنانے کے لیے 37 کروڑ 59 لاکھ ڈالرز کی خطیر مالی معاونت کی منظوری دے دی ہے۔ ورلڈ بینک کے مطابق، اس منصوبے کا بنیادی مقصد ملک میں بجلی کے بڑے بریک ڈاؤنز کا خاتمہ، ترسیلی نظام کو اپ گریڈ کرنا اور اہم سب اسٹیشنز پر بجلی کے بہاؤ کو بہتر بنانا ہے۔ ورلڈ بینک کے کنٹری ڈائریکٹر کا کہنا ہے کہ پاکستان میں توانائی کے چیلنجز ملکی معاشی استحکام سے گہرے جڑے ہوئے ہیں اور بجلی کے کمزور ترسیلی نظام کے باعث کروڑوں پاکستانی متاثر ہو رہے ہیں، جبکہ پیداواری صلاحیت کا پورا استعمال نہ ہونے سے عوام لوڈشیڈنگ اور مہنگی بجلی بھگتنے پر مجبور ہیں۔ اعلامیے کے مطابق، اس منصوبے کے تحت ترسیلی گرڈ کو مستحکم کرنے کے لیے جدید ترین آلات نصب کیے جائیں گے، جس سے گھروں، کاروباروں اور صنعتوں تک زیادہ سے زیادہ ماحول دوست اور قابلِ تجدید (Renewable) توانائی پہنچانے میں مدد ملے گی، جو کہ بجلی کی مجموعی لاگت کو کم کرنے میں بھی معاون ثابت ہوگی۔