امریکی صدر ٹرمپ سینیٹ پر برہم، بل پر دستخط سے انکار کر دیا

امریکی صدر ڈونلڈ ٹرمپ نے سینیٹ کے رویے پر شدید ناراضی کا اظہار کرتے ہوئے دونوں جماعتوں (ریپبلکن اور ڈیموکریٹس) کی مشترکہ حمایت سے منظور ہونے والے ہاؤسنگ بل پر دستخط کرنے سے انکار کر دیا ہے اور اسے ’’بہت بورنگ‘‘ قرار دیا ہے۔ امریکی کانگریس میں شدید سیاسی تقسیم کے باوجود گھروں کی بڑھتی ہوئی قیمتوں کو کنٹرول کرنے کے لیے اس بل پر دونوں جماعتوں کا اتفاق ایک نادر موقع تھا، جس کی اہم شقوں میں گھروں کی تعمیر کے لیے ماحولیاتی جائزوں کے عمل کو تیز کرنا اور وال اسٹریٹ کے بڑے سرمایہ کاروں کی جانب سے سنگل فیملی گھروں کی خریداری پر حد مقرر کرنا شامل ہے۔

سوشل میڈیا پر جاری اپنے ایک بیان میں صدر ٹرمپ نے واضح کیا کہ وہ ووٹر رجسٹریشن کے لیے شہریت کا ثبوت لازمی قرار دینے والے قانون ’’سیو امریکا ایکٹ‘‘ کو منظور نہ کیے جانے پر سینیٹ کے خلاف احتجاجاً اس بل پر دستخط نہیں کر رہے۔ اس سے قبل انہوں نے 24 جون کو دستخط کی تقریب بھی اچانک منسوخ کر دی تھی تاکہ ریپبلکن اراکین پر دباؤ ڈالا جا سکے۔ تاہم، صدر کے دستخط نہ کرنے کے باوجود یہ مشترکہ بل بغیر کسی ویٹو کے ہفتے کے روز خودبخود نافذ العمل ہو کر قانون بن جائے گا