اسرائیل لبنان جنگ بندی پر عمل درآمد کیلئے امریکی فوجی وفد بیروت پہنچ گیا

امریکا نے اسرائیل اور حزب اللہ کے درمیان لڑائی کے خاتمے کے لیے طے پانے والے فریم ورک معاہدے پر عمل درآمد میں تعاون کے لیے اپنا ایک اہم فوجی وفد لبنان بھیج دیا ہے۔ ’فنانشل ٹائمز‘ کی رپورٹ کے مطابق لبنان کے دو سینئر حکام نے تصدیق کی ہے کہ امریکی فوج کی سینٹرل کمانڈ (سینٹ کام) نے اپنے اعلیٰ اہلکار بیروت روانہ کیے ہیں۔ یہ وفد اگلے ہفتے روم میں لبنان اور اسرائیل کے درمیان ہونے والے تکنیکی مذاکرات سے قبل پہنچا ہے، جہاں 26 جون کو امریکا کی سرپرستی میں طے پانے والے فریم ورک معاہدے پر عمل درآمد کا تفصیلی جائزہ لیا جائے گا، جس کے تحت اسرائیلی افواج مرحلہ وار لبنانی علاقے سے انخلا کریں گی۔

دوسری جانب، ترکی کی خبر رساں ایجنسی ’انادولو‘ کے مطابق امریکی محکمہ خارجہ کے ایک ترجمان نے تصدیق کی ہے کہ سینٹ کام اس وقت لبنان اور اسرائیل دونوں کے ساتھ قریبی رابطے میں ہے۔ ترجمان نے بتایا کہ اسرائیل اور لبنان کے درمیان طے پانے والا یہ تاریخی معاہدہ اب باقاعدہ عمل درآمد کے مرحلے میں داخل ہو چکا ہے، جبکہ پہلے پائلٹ زون، جہاں سے اسرائیلی افواج کے مرحلہ وار انخلا کی توقع ہے، کا آغاز آئندہ چند روز کے اندر ہونے کا قوی امکان ہے۔