پنجاب بھر میں ڈیجیٹل ادائیگیوں پر ٹیکس کٹوتی کا نیا اور آسان نظام لاگو

پنجاب ریونیو اتھارٹی (PRA) نے صوبے بھر میں ڈیجیٹل ادائیگیوں پر ٹیکس کٹوتی کا ایک نیا اور آسان نظام نافذ کر دیا ہے، جس کے تحت کارڈ یا ای-پیمنٹ کے ذریعے کٹنے والا ٹیکس اب براہِ راست حکومتی خزانے میں منتقل ہوگا۔ ترجمان پی آر اے کے مطابق، نئے نظام میں ڈیجیٹل ادائیگیاں کرنے والے صارفین کو ٹیکس میں بھاری چھوٹ دی گئی ہے؛ ہوٹلوں اور ریسٹورنٹ سیکٹر میں کیش ادائیگی پر 16 فیصد جبکہ کریڈٹ کارڈ یا ڈیجیٹل ادائیگی پر 50 فیصد رعایت کے ساتھ صرف 8 فیصد ٹیکس لاگو ہوگا۔ اس کے علاوہ بیوٹی پارلرز، سلونز، فیشن ڈیزائنرز، کاسمیٹک و پلاسٹک سرجری اور لیزر ٹریٹمنٹ کے مراکز پر ٹیکس کی شرح کم کر کے صرف 5 فیصد، جبکہ ایونٹ مینجمنٹ، ٹور آپریٹرز، جمنازیم اور لانڈری سروسز پر 8 فیصد مقرر کی گئی ہے۔ ترجمان نے عوام سے اپیل کی ہے کہ وہ صوبے کی ترقی میں اپنا کردار ادا کرنے اور ٹیکس کی محفوظ منتقلی یقینی بنانے کے لیے ہمیشہ ڈیجیٹل ادائیگیاں کریں اور ‘پکی رسید’ ضرور طلب کریں، جبکہ پکی رسید نہ دینے والے فوڈ آپریٹرز کے خلاف پی آر اے کو فوری شکایت درج کروائیں۔