بھارت اور افغانستان کا ڈی این اے ایک ہے‘، نئی دہلی میں افغان وزیرِ زراعت عطاء اللہ عمری کا متنازع بیان

نئی دہلی کے دورے کے دوران افغان طالبان رجیم کے وزیرِ زراعت مولوی عطاء اللہ عمری نے ایک متنازع بیان میں افغانستان اور بھارت کا ڈی این اے ایک قرار دیا ہے، جس سے ماہرین کے مطابق اس موقف کو تقویت ملتی ہے کہ یہ دونوں ممالک ایک ہی سکے کے دو رخ ہیں۔ بھارتی جریدے ’دی اکنامک ٹائمز‘ کے مطابق افغان وزیر نے نئی دہلی میں گفتگو کرتے ہوئے کہا کہ انہیں بھارت میں ہرگز یہ احساس نہیں ہوا کہ وہ کسی غیر ملک میں ہیں، بلکہ یوں لگا جیسے یہ ان کا اپنا ہی ملک ہو کیونکہ دونوں کا ڈی این اے ایک ہے۔

سیاسی و دفاعی ماہرین نے اس بیان پر شدید ردعمل کا اظہار کرتے ہوئے کہا ہے کہ طالبان رجیم اور مودی سرکار کے ڈی این اے میں یقیناً مماثلت ہے، کیونکہ ایک طرف مودی کی پشت پناہی اور دوسری طرف طالبان رجیم کی سرپرستی میں پاکستان میں دہشت گردی کو فروغ دیا جا رہا ہے۔ ماہرین نے تنقید کرتے ہوئے کہا کہ مظلوم کشمیریوں اور فلسطینیوں پر ہونے والے مظالم پر ہمیشہ مجرمانہ خاموشی اختیار کرنے والی طالبان رجیم محض چند مالی مفادات کی خاطر بھارت سے ڈی این اے ملا کر اسلامی روایات سے منحرف ہو چکی ہے۔ مزید برآں، ماہرین کا کہنا ہے کہ بھارت میں مسلمانوں پر مودی سرکار کے مظالم اور افغانستان میں طالبان کے غیر قانونی اقتدار کے دوران مسلمانوں کو نشانہ بنانا دونوں کے یکساں مائنڈ سیٹ کو ظاہر کرتا ہے۔ مودی کی جانب سے اسرائیل کو فادر لینڈ قرار دیے جانے کے بعد، افغان وزیر کا یہ بیان افغانستان، بھارت اور اسرائیل کی نظریاتی قربت اور ایک ہی ایجنڈے پر کاربند ہونے کا واضح عکاس ہے۔