امریکی محکمہ خارجہ کی افغان طالبان رجیم پر تنقید، یرغمالیوں کی رہائی کا مطالبہ

امریکا نے افغان رجیم کی جانب سے غیر ملکی شہریوں کو یرغمال بنا کر سیاسی مفادات حاصل کرنے کا معاملہ ایک بار پھر اٹھا دیا ہے۔ امریکی محکمہ خارجہ کی ترجمان الزبتھ سٹکنی نے افغان طالبان رجیم پر شدید تنقید کرتے ہوئے کہا ہے کہ طالبان اب بھی غیر ملکی شہریوں کو اغوا کرنے اور انہیں سیاسی مقاصد کے لیے استعمال کرنے کی پالیسی پر عمل پیرا ہیں۔ انہوں نے مطالبہ کیا کہ افغان طالبان اس “ہوسٹیج ٹیکنگ پالیسی” کے تحت قید تمام بے قصور امریکی شہریوں کو فوری طور پر رہا کریں۔ ترجمان کا کہنا تھا کہ افغانستان میں دہشت گردی کے خلاف جنگ امریکا کے اہم ترین قومی مفادات میں شامل ہے۔

الزبتھ سٹکنی نے افغانستان میں خواتین اور لڑکیوں کے انسانی حقوق کی بدترین صورتحال پر بھی طالبان رجیم کو کڑی تنقید کا نشانہ بنایا اور کہا کہ وہاں خواتین کے حقوق کی صورتحال انتہائی خوفناک ہے، جسے فوری طور پر بند ہونا چاہیے۔ دوسری جانب عالمی ماہرین کا کہنا ہے کہ غیر ملکی شہریوں کو یرغمال بنا کر سیاسی دباؤ کے لیے استعمال کرنا عالمی قوانین اور سفارتی اصولوں کی کھلی خلاف ورزی ہے، اور طالبان کی انہی پالیسیوں اور انسانی حقوق کی پامالیوں نے انہیں سفارتی طور پر تنہا کر دیا ہے۔