ایران نے جنگ بندی کی مکمل پاسداری کی، امریکا خلاف ورزی کر رہا ہے: عراقچی

ایرانی وزیرِ خارجہ عباس عراقچی نے کہا ہے کہ تہران نے امریکا کے ساتھ ہونے والی جنگ بندی کے حوالے سے اپنے تمام وعدوں کی پاسداری کی ہے، جبکہ اس کے برعکس امریکی صدر ڈونلڈ ٹرمپ کا دعویٰ ہے کہ جنگ بندی ختم ہو چکی ہے اور وہ مزید مذاکرات کے لیے تیار ہیں۔ سوشل میڈیا پر جاری اپنے ایک بیان میں عباس عراقچی نے امریکی وزیرِ خزانہ پر مفاہمتی یادداشت کی شق 9 کی خلاف ورزی کا الزام عائد کیا، جس کے تحت امریکا کو خطے میں مزید فوجی دستے تعینات نہ کرنے کا پابند کیا گیا تھا۔

دوسری جانب، ایرانی وزیرِ خارجہ آج عمان کا ایک انتہائی اہم دورہ کر رہے ہیں جہاں وہ خطے کی تازہ صورتحال اور بالخصوص آبنائے ہرمز کی موجودہ صورتِ حال پر اعلیٰ سطح کی بات چیت کریں گے۔ ایرانی سرکاری خبر رساں ادارے ’ارنا‘ کے مطابق، اس دورے میں دونوں ممالک کے حکام علاقائی سلامتی اور بحری گزرگاہوں کے تحفظ پر تفصیلی مشاورت کریں گے۔ عالمی تجارت اور تیل کی ترسیل کے لیے ریڑھ کی ہڈی سمجھے جانے والے راستے ’آبنائے ہرمز‘ میں بڑھتی ہوئی کشیدگی کے تناظر میں ایران اور عمان کی یہ ملاقات انتہائی اہمیت اختیار کر گئی ہے۔