ورلڈ بینک کے صدر کو فیفا ورلڈ کپ 2026 کی آفیشل فٹ بال ’ٹرائیونڈا‘ کا تحفہ، سفیرِ پاکستان رضوان سعید شیخ کی اجے بنگا سے ملاقات

واشنگٹن میں متعین سفیرِ پاکستان رضوان سعید شیخ نے ورلڈ بینک کے صدر اجے بنگا سے ایک اہم ملاقات کی، جس میں انہوں نے صدر ورلڈ بینک کو امریکا، کینیڈا اور میکسیکو میں شیڈول فیفا ورلڈ کپ 2026 کے لیے پاکستان میں تیار کردہ آفیشل فٹ بال “ٹرائیونڈا” (Trivela) تحفتاً پیش کیا۔ صدر ورلڈ بینک نے پاکستان میں تیار کردہ اسپورٹس مصنوعات، خصوصاً ٹرائیونڈا فٹ بال کے اعلیٰ معیار کی دل کھول کر تعریف کی۔ اس موقع پر گفتگو کرتے ہوئے سفیرِ پاکستان کا کہنا تھا کہ پاکستان کھیلوں کے ذریعے عالمی برادری کو ایک دوسرے کے قریب لانے میں اپنا مثبت کردار ادا کر رہا ہے۔ انہوں نے فخر کا اظہار کرتے ہوئے کہا کہ فیفا ورلڈ کپ 2026 کے لیے پاکستان کے تیار کردہ فٹ بال کا انتخاب اور اس کا عالمی معیار ملک کے لیے ایک بڑا طرۂ امتیاز ہے۔ رضوان سعید شیخ نے اس بات پر زور دیا کہ معیاری کھیلوں کے سامان کی تیاری میں پاکستان کا مشہور شہر سیالکوٹ عالمی شہرت کا حامل ہے اور عالمی برادری کا یہ اعتماد پاکستان کی اسپورٹس انڈسٹری کے لیے انتہائی حوصلہ افزا ہے۔

ملاقات کے دوران انہوں نے ورلڈ بینک کے ساتھ پاکستان کی طویل المیعاد شراکت داری کی اہمیت کا اعتراف بھی کیا اور اس عزم کا اعادہ کیا کہ باہمی تعاون سے جاری اور مستقبل کے تمام منصوبوں کو ہر صورت نتیجہ خیز بنایا جائے گا۔