امریکا کا ایران سے آبنائے ہرمز میں حملے بند کرنے کے عوامی اعلان کا مطالبہ، ساتھ دھمکی بھی دیدی

امریکی حکام نے دعویٰ کیا ہے کہ واشنگٹن نے تہران سے باضابطہ مطالبہ کیا ہے کہ وہ آبنائے ہرمز میں تجارتی جہازوں پر حملے بند کرنے اور غیر قانونی ٹول ٹیکس کی وصولی نہ کرنے کا اعلان عوامی سطح پر کرے۔ امریکی حکام کے مطابق، امریکہ نے ایران کو سخت دھمکی دی ہے کہ اگر اس نے یہ اعلان عوامی سطح پر نہ کیا تو اس کے نتائج اچھے نہیں ہوں گے۔ غیر ملکی خبر رساں ایجنسی کے مطابق، امریکی حکام کا کہنا ہے کہ حالیہ دنوں میں دونوں ممالک کے درمیان ہونے والی بات چیت کافی حد تک نتیجہ خیز رہی ہے،

تاہم انہوں نے واضح کیا کہ ایران کی جانب سے جوہری تنصیبات تک رسائی نہ دینے کی صورت میں امریکہ کے پاس اب بھی عسکری آپشنز موجود ہیں، اور مطلوبہ جوہری نتائج حاصل نہ ہوئے تو ایران کے ساتھ کوئی نیا معاہدہ نہیں کیا جائے گا۔ دوسری جانب، ایک امریکی عہدیدار نے یہ انکشاف بھی کیا ہے کہ ایران نے مذاکرات کے دوران امریکہ کو بتایا ہے کہ بحری جہازوں پر حالیہ حملے ایرانی حکومتی نظام کے بعض سخت گیر دھڑوں کی کارروائیوں کا نتیجہ تھے۔