بھارتی فلم انڈسٹری میں مذاہب کا مذاق اڑایا جاتا ہے، نصیر الدین شاہ کی کڑی تنقید

ممبئی: معروف اور سینیئر بھارتی اداکار نصیر الدین شاہ نے بالی ووڈ میں مذہب، شناخت اور اقلیتوں کے حوالے سے پیش کیے جانے والے مواد پر سخت برہمی کا اظہار کرتے ہوئے کہا ہے کہ بھارتی فلم انڈسٹری میں بار بار مختلف مذاہب کا مذاق اڑایا گیا ہے، جسے تفریح کے نام پر ایک مستقل رجحان کے طور پر فروغ دیا جاتا رہا ہے۔ ایک حالیہ تقریب سے خطاب کرتے ہوئے انہوں نے واضح کیا کہ بالی ووڈ نے اپنی فلموں کی کہانیوں میں صرف سنسنی پیدا کرنے اور تجارتی فائدے کے لیے مختلف مذہبی برادریوں کو اکثر نشانہ بنایا ہے، جس میں مختلف شناختوں کو انتہائی سطحی اور دقیانوسی انداز میں پیش کیا جاتا ہے۔

نصیر الدین شاہ نے انڈسٹری کے اس طرزِ عمل پر سوالیہ انداز اختیار کرتے ہوئے کہا کہ “آخر وہ کون سا مذہب ہے جس کا بالی ووڈ میں مذاق نہیں اڑایا گیا؟” انہوں نے تفصیلات بتاتے ہوئے کہا کہ سکھ، پارسی اور عیسائی برادریوں کو اکثر فلموں میں محض مزاحیہ یا روایتی کرداروں تک محدود رکھا گیا، جبکہ مسلمان کرداروں کے ساتھ بھی یہی رویہ اپنایا گیا۔ ان کے مطابق، مسلمانوں کو زیادہ تر ایک مخصوص سانچے میں ڈھال کر دکھایا جاتا ہے، جہاں وہ اکثر فلم کے آغاز میں ہیرو کا مخلص دوست بنتا ہے اور آخر میں اس کی جان بچاتے ہوئے اپنی قربانی دے دیتا ہے۔ انہوں نے فلم سازوں پر زور دیا کہ وہ تفریح کے نام پر کسی بھی برادری کی دل آزاری اور غلط عکاسی سے گریز کریں۔