ایران کے ساتھ دوطرفہ تعاون تمام شعبوں میں بڑھانا چاہتے ہیں: اسحاق ڈار

اسلام آباد: نائب وزیرِ اعظم اور وزیرِ خارجہ اسحاق ڈار سے ایران کے لیے پاکستان کے نامزد سفیر عمران احمد صدیقی نے اہم ملاقات کی ہے، جس میں تہران اور اسلام آباد کے مابین تمام شعبوں میں دوطرفہ تعاون کو مزید بلندیوں تک لے جانے کے عزم کا اعادہ کیا گیا ہے۔ ترجمان دفترِ خارجہ کے مطابق ملاقات کے دوران نائب وزیرِ اعظم نے پاکستان اور ایران کے درمیان موجود گہرے تاریخی، ثقافتی اور برادرانہ تعلقات کو نمایاں کرتے ہوئے اس بات پر زور دیا کہ پاکستان پڑوسی ملک کے ساتھ اپنے تجارتی روابط، عوامی رابطوں (پیپل ٹو پیپل کانٹیکٹ) اور علاقائی تعاون کو مزید مضبوط بنانا چاہتا ہے۔

اسحاق ڈار نے نامزد سفیر کو گائیڈ لائنز دیتے ہوئے کہا کہ دونوں ممالک کے مابین قریبی رابطہ کاری اور باہمی افہام و تفہیم کے ذریعے دوطرفہ روابط میں مثبت پیش رفت کے تسلسل کو برقرار رکھنا انتہائی اہم ہے۔ انہوں نے واضح کیا کہ پاکستان پاک-ایران دوطرفہ شراکت داری کو نئی وسعتیں دینے کے لیے پوری طرح پرعزم ہے۔ اس موقع پر نائب وزیرِ اعظم نے علاقائی امن، بامقصد مکالمے اور مشرقِ وسطیٰ سمیت پورے خطے میں استحکام کے فروغ کے لیے پاکستان کے تعمیری، مثبت اور ذمہ دارانہ سفارتی کردار کو بھی خصوصی طور پر اجاگر کیا۔