امریکا نے حملہ کیا تو خون کی ندیاں بہیں گی، کیوبا کی دھماکا خیز وارننگ

ہوانا: کیوبا کے صدر میگوئیل ڈیاز کینال نے امریکا کو کڑی وارننگ جاری کرتے ہوئے خبردار کیا ہے کہ اگر واشنگٹن نے کیوبا کے خلاف کسی بھی قسم کی فوجی کارروائی کی تو اس کے نتیجے میں شدید ’خونریزی‘ ہوگی اور پورے خطے کا امن و استحکام مستقل طور پر خطرے میں پڑ جائے گا۔ سوشل میڈیا پلیٹ فارم ‘ایکس’ (سابقہ ٹوئٹر) پر جاری کردہ اپنے ایک سخت بیان میں کیوبن صدر نے واضح کیا کہ کیوبا دنیا کے کسی بھی ملک کے لیے خطرہ نہیں ہے، تاہم اگر ان کی سرزمین پر حملہ کیا گیا تو کیوبا کے عوام دشمن کے خلاف بھرپور اور تاریخی مزاحمت کریں گے۔

کیوبن صدر کا یہ جارحانہ بیان ایک ایسے وقت میں سامنے آیا ہے جب امریکی میڈیا رپورٹس میں یہ سنسنی خیز دعویٰ کیا گیا ہے کہ کیوبا نے حال ہی میں 300 سے زائد جدید عسکری ڈرونز حاصل کیے ہیں اور وہ ان کے جارحانہ استعمال سے متعلق مختلف منصوبوں پر سنجیدگی سے غور کر رہا ہے۔ امریکی انٹیلی جنس رپورٹس کے مطابق، ان ڈرونز کے ممکنہ اہداف میں کیوبا میں قائم امریکی بحری اڈہ ‘گوانتانامو بے’ (Guantanamo Bay)، خطے میں موجود امریکی جنگی جہاز اور امریکی ریاست فلوریڈا کا ساحلی علاقہ ‘کی ویسٹ’ (Key West) شامل ہو سکتے ہیں۔ کیوبا کی حکومت نے ان تمام امریکی الزامات کو یکسر مسترد کرتے ہوئے کہا ہے کہ امریکا ایک بار پھر ہوانا کے خلاف ممکنہ فوجی مداخلت کا من گھڑت جواز پیدا کرنے کی کوشش کر رہا ہے۔

دوسری جانب، دارالحکومت ہوانا کے عام شہریوں نے بھی امریکی دھمکیوں کے خلاف سخت ردعمل اور قومی یکجہتی کا اظہار کیا ہے۔ مقامی شہریوں کا کہنا ہے کہ ملک میں جاری شدید معاشی بحران اور ایندھن کی شدید قلت کے باوجود کیوبا اپنے دفاع اور قومی خودمختاری سے ایک انچ بھی پیچھے نہیں ہٹے گا۔ بین الاقوامی رپورٹس کے مطابق، امریکا کی جانب سے وینزویلا سے کیوبا کو ہونے والی تیل کی فراہمی محدود کیے جانے کے بعد جزیرہ نما ملک اس وقت تاریخ کے بدترین توانائی بحران کا شکار ہے۔ ملک بھر میں ایندھن کی قلت اس حد تک بڑھ چکی ہے کہ کئی علاقوں میں روزانہ صرف ایک سے دو گھنٹے بجلی دستیاب ہوتی ہے۔ واضح رہے کہ امریکا اور کیوبا کے مابین تعلقات گزشتہ کئی دہائیوں سے کشیدہ ہیں، تاہم حالیہ ڈرون تنازع نے دونوں روایتی حریفوں کے درمیان جنگ کے بادل مزید گہرے کر دیے ہیں۔