امریکا نے بھارت کیلئے اپاچی ہیلی کاپٹر سپورٹ سروسز اور آلات کی منظوری دیدی

واشنگٹن: امریکا نے بھارت کے ساتھ دفاعی تعلقات کو مزید مستحکم کرتے ہوئے اپاچی ہیلی کاپٹروں کی سپورٹ سروسز اور متعلقہ آلات کی فراہمی کی منظوری دے دی ہے، جس کی کل مالیت 19 کروڑ 82 لاکھ ڈالر ہے۔ امریکی محکمہ خارجہ کے مطابق اس اہم دفاعی معاہدے کے تحت بوئنگ اور لاک ہیڈ مارٹن کمپنیاں مرکزی کنٹریکٹرز کے طور پر خدمات سرانجام دیں گی، جبکہ فراہم کی جانے والی سپورٹ سروسز میں پائلٹس اور عملے کی ٹریننگ، سپیئر پارٹس اور دیگر ضروری تکنیکی معاونت شامل ہوگی۔ واضح رہے کہ بھارتی فضائیہ اور فوج کے پاس اس وقت 28 اپاچی ہیلی کاپٹر موجود ہیں جن کی جنگی صلاحیتوں کو برقرار رکھنے کے لیے یہ معاہدہ انتہائی اہم ہے۔ مزید برآں، امریکا نے بھارت کے لیے 23 کروڑ ڈالر مالیت کی الٹرا لائٹ ہووٹزر (توبخانوں) کی سپورٹ سروسز کی بھی منظوری دی ہے، جو دونوں ممالک کے درمیان بڑھتے ہوئے اسٹریٹجک اور عسکری تعاون کا منہ بولتا ثبوت ہے۔